If someone would like to translate this, please feel free...
入行 12年的馬國明，雖然演出機會不斷，不過未能及《衝上雲霄》兄弟黃宗澤及吳卓羲等一飛冲天，不過最近馬國明新劇一部接一部，終於奸出頭，尤其是《真相》中演奸仔Alex害死唐詩詠，令他被觀眾和網民鬧不停，對於觀眾的激烈反應，馬國明直言：「Alex呢個角色會攞分多啲！」擺明車馬博攞獎。
近期以奸取勝的馬國明先後在《談情說案》、《女拳》、《真相》以及《紫禁驚雷》扮演不同類型的角色，不過《紫禁驚雷》飾演二皇爺的馬國明只愛江山不愛美人，似乎打動不了女觀眾的芳心，反而不少網民對馬國明在《真相》 Alex一角讚不絕口。
觀眾未夠狠
馬國明也認同網民的觀點說：「唔出奇呀，我都覺得《真相》嘅反應好啲，尤其係女性觀眾， Alex呢個角色會攞分多啲，因為你知道 Alex係犯法，但係佢對個女仔嘅感情係真。而二皇爺唔鍾意佢嘅老婆，只係利用老婆去攞外父嘅兵權謀朝篡位，你會覺得佢好自私，所以係冇觀眾嘅攞分位。」
馬國明續說：「嗰陣播完大 C（唐詩詠）死咗之後，咁啱我第二日出嚟做嘢，搞到我喺每個地方都俾人鬧一次，好多人一見到我就鬧我害死佢，又話我好衰，但係啲觀眾鬧完之後會覺得 Alex係一個好慘嘅人，佢都有值得同情嘅地方，觀眾有咁嘅反應梗係開心，不過我覺得鬧得唔夠狠。」
捱足 12年終於捱出頭，馬國明笑說：「唔可以咁講，我只係用忙字嚟形容，我都希望快啲捱出頭，不過家都幾開心，我拍完一輪奸角之後，公司又畀我拍《回到三國》，呢一部又有別於其他，今次係拍搞笑戲，其實我好耐冇拍過搞笑戲，我本身都好搞笑，只係慢熱啲啫。」
當年馬國明曾經與黃宗澤、吳卓羲和陳鍵鋒合作拍《衝上雲霄》，劇集一出街， S4的確迷倒不少女觀眾，眼見其他人已有出頭天，相比之下總有點不是味兒，他說：「我又冇唔開心、真係冇，唔係講笑，好似前排俾人話我搭地鐵，完全零星味，我咪當笑話一則，佢又唔係寫我窮到搭地鐵。我明白同佢哋比，梗係有啲人覺得係落後啲，但係你唔可以吓吓望住啲最紅嘅人比，調番轉頭同訓練班啲人比，我又係幸運嘅一個，起碼有監製搵我，而且做嘅角色都唔錯。」
獎金最實際
本性樂觀的馬國明坦言曾經為某些新聞不開心，他說：「例如以前我覺得自己已經好畀心機去做，點知寫出嚟都係話我浮誇、唔識做戲，嗰陣睇會唔開心，不過家明白咗個道理，觀眾鍾意你就鍾意你，只要佢鍾意嗰個人，基本上佢做乜都得，演技係好主觀，最緊要係觀眾話好，如果人哋抗拒你，基本上做乜都冇用。」
問馬國明對頒獎禮的信心，他直言：「有冇機會唔係自己講，我只可以盡力而為，不過對我嚟講乜獎都好，最緊要有得爭有得攞，我個人好實際，最好係獎金。」
感情篇：誠徵孝順新抱仔
馬國明努力工作漸見成績，可惜感情仍未見起色，即使先後與曾華倩、胡定欣和李詩韻傳出緋聞，可惜全沒下文，事隔多年重提舊事，馬國明大方地說：「我只可話當中係有真有假，但係已經過咗去，唔想講太多影響人。嗰陣係有好多無形壓力，好易會有磨擦，加上本身又未穩定，除非你唔拍拖，如果唔係真係好難等到穩定咗先講，暫時都未諗到辦法。」
組織大家庭
感情冇着落，惟有寄情工作，馬國明笑說：「我想搵多啲錢，而家我都有啲發錢寒，我想令屋企人生活好啲，我諗個個男人都係咁諗，我目標希望買大屋同屋企人住。」
原來馬國明希望結婚之後仍與家人同住，維持傳統式的大家庭，他說：「其實我唔介意，只係怕將來嘅太太介意，最近我接觸多咗結咗婚嘅女仔，先知道原來好多女仔唔鍾意同奶奶住，佢哋覺得同奶奶住好麻煩，點都係相見好同住難，搞到我有時都會諗如果夾唔到都好煩，希望好彩遇到一個可以同屋企人住，未遇到之前要努力搵多啲錢。」
蘋果日報 2011-08-28
Source: Apple Daily
No comments:
Post a Comment